Hjörvar Hafliðason, sparkspekingurinn vinsæli, segir að Kári Kristján Kristjánsson, landsliðsmaður í handbolta, eigi að biðjast afsökunar á ummælum sínum um karlalandsliðið í knattspyrnu á dögunum.
,,Kann engin helvítis Þjóðsönginn ? Og eitt gerpið að japla tyggjó á meðan….. Fyrirliðinn eins og stytta ! Átakanlegt!“ Skrifaði Kári á Facebook eftir leik Íslands og Armeníu í undankeppni HM á fimmtudag.
,,Ég þekki Kára af engu nema góðu en hann olli mér smá vonbrigðum þarna. Virðingarleysi á milli íþróttagreina, það fer í taugarnar á mér. Maður hefði ekki séð Geir Sveinsson hjóla svona í Ásgeir Sigurvinsson og hans lið,“ sagði Hjörvar í hlaðvarpsþætti sínum, Dr. Football, í dag.
Hann hélt áfram. ,,Hann kallaði leikmenn landsliðsins gerpi. Ég vil meina að Kári þurfi að fara og biðjast afsökunar.“
Kári gefur þó ekkert eftir og ætlar ekki að gera eins og Hjörvar óskar eftir og biðjast afsökunar.
„Nei ég ætla nú ekki að biðjast afsökunar, fyrir mér er þetta ekki mjög djúp pæling. Það hefur alltaf farið í taugarnar á mér þegar fólk syngur ekki með,“ sagði Kári við Fréttablaðið í dag.
„Syngdu þennan blessaða þjóðsöng þegar þú ert í framlínunni. Það er ekkert dýpra en það.“
