Þriðjudagur 02.mars 2021
433Sport

Aron Einar um COVID ástandið í Katar og framtíðina: „Mér leið aldrei eins og Heimir yrði rekinn“

Hörður Snævar Jónsson
Mánudaginn 18. janúar 2021 14:30

Aron Einar og Heimir hafa upplifað margt saman, frá mögnuðum árangri Íslands yfir í brösugt gengi í Katar. MYND/GETTY

Ekki missa af Helstu tíðindum dagsins í pósthólfið þitt

Lesa nánar

Gengi Al-Arabi í Katar hefur verið með miklum ágætum undan- farnar vikur. Heimir Hallgrímsson, þjálfari liðsins, var sagður valtur í sessi en hefur snúið við blaðinu. Aron Einar Gunnarsson og fjölskylda hans una hag sínum vel í Katar og verða þar áfram.

Aron Einar Gunnarsson, landsliðsfyrirliði Íslands, og hans stóra fjölskylda njóta lífsins þar sem sólin skín alla daga, allan ársins hring. Aron og eiginkona hans, Kristbjörg Jónasdóttir, hafa ásamt börnum sínum búið í Katar síðasta eina og hálfa árið. Aron leikur með Al-Arabi þar í landi en Heimir Hallgrímsson er þjálfari liðsins. Fjölskyldan nýtur þess í botn að búa í Katar og verður hið minnsta í eitt og hálft ár til viðbótar, og líklega lengur. Aron og Kristbjörg og strákarnir þeirra þrír kunna vel við lífið í Katar og hefur AlArabi áhuga á að framlengja dvöl Arons í landinu. „Við erum ekki byrjaðir á viðræðum um nýjan samning, þeir hafa gefið það í skyn að það sé vilji fyrir því. Ég er með möguleikann á ári til viðbótar sem ég fæ, ég þarf að spila ákveðinn fjölda af leikjum og það er nánast komið. Þeir vilja gera nýjan samning, við erum klár í það fjölskyldan. Okkur líður vel hérna, það kemur í ljós hvernig þau mál þróast en það er hið minnsta eitt tímabil í viðbót,“ sagði Aron léttur í lund á leið á æfingu, í flestum atvinnumannadeildum er æft fyrripart dags en vegna hitans í Katar er æft að kvöldi til.

Leið ekki eins og Heimir yrði rekinn:
Gengi Al-Arabi í upphafi tímabils var slæmt og var talsverð umræða um það að Heimir Hallgrímsson yrði rekinn úr starfi þjálfara. Eftir að hafa tapað naumlega í úrslitum bikarsins í desember hefur liðið hins vegar farið á flug í deildinni og bjartari tímar virðast fram undan. „Það eru litlir hlutir sem hafa komið heim og saman, við vorum að eiga við mikið af meiðslum í upphafi tímabils og það voru nýir leikmenn að koma inn. Það var fát á þessu en skömmu fyrir bikarúrslitaleikinn var okkar sterkasta lið komið saman. Við héldum dampi eftir að hafa fengið sjálfstraust og jákvæðni í bikarúrslitum, það er helsta útskýringin á þessum viðsnúningi,“ sagði Aron og hann upplifði aldrei þá tilfinningu að Heimir og tveir íslenskir aðstoðarmenn hans yrðu reknir.

„Mér leið aldrei eins og Heimir yrði rekinn, vissulega veit maður alveg hvernig fótboltaheimurinn hér í Katar virkar. Það er mikil þjálfara- og leikmannavelta, það er skipt um útlendinga villt og galið og þjálfarana líka. Maður finnur samt fyrir því að klúbburinn tók þá stefnu að gefa þessu tíma. Þetta er verkefni sem Heimir er í og ætlar að tækla, manni leið þannig á þessu augnabliki. Þeir gerðu sér grein fyrir því að við værum ekki að spila á okkar sterkasta liði, þeir sáu jákvæða punkta í því sem við vorum að ganga í gegnum. Mér leið aldrei eins og Heimir yrði rekinn, ég fékk ekki þá tilfinningu sjálfur. Heimir er samt ekkert að segja mér hvað fer fram á fundi hans og forsetans.“

GettyImages

Vont en það venst að fá pinnann í nefið:
Ástandið að því er varðar COVID-19 í Katar er gott, Aron fer í próf vikulega hið minnsta og segir það veita sér öryggi þegar hann heldur heim á leið. „Það er mjög gott ástand, þeir halda vel á spöðunum hérna. Þeir hafa gert vel í þessu öllu, við erum í þessum prófum vikulega í liðinu. Manni líður eins og maður sé öruggur og sérstaklega í kringum fjölskylduna þegar maður kemur heim eftir æfingar og leiki, mér finnst þeir hafa tæklað þetta vel. Þeir eru byrjaðir að dæla bóluefninu í fólkið hérna, leikmenn landsliðsins hafa fengið sprautur. Næst á dagskrá er að leikmenn í deildinni fái bóluefnið og það gerist líklega í febrúar,“ sagði Aron sem segir það vissulega vont að láta troða pinnanum í nef sitt en öryggið fyrir hann og fjölskylduna skipti máli.

„Þetta er ekki þægilegt, manni líður samt betur að fara í það en ekki. Að vita hvar maður stendur, þá getur maður knúsað fjölskylduna sína. Þetta er ekki þægilegast í heimi en það er betra að vera öruggur en ekki.“

Spenntur fyrir samstarfi við Arnar og Eiðs Smára
Íslenska landsliðið hefur vegferð sína í undankeppni HM 2020 í mars, mótið fer fram í Katar og er það draumur Arons að Ísland taki þátt í því móti. Liðið leikur þrjá leiki í mars sem verða þeir fyrstu undir stjórn Arnars Þórs Viðarssonar og Eiðs Smára Guðjohnsen. „Ég átti gott spjall við Arnar um daginn og heyrði í Eiði Smára og Guðna Bergssyni, þetta er góð stefna. Það heyrist á þeim að það er ekki mikið af breytingum í vændum, þeir eru ekki að fara að breyta miklu nema fyrir utan litla hluti sem þeir vilja leggja áherslu á,“ sagði Aron um nýtt þjálfarateymi. Aron og liðsfélagar hans munu í sumar horfa súrir á svip á Evrópumótið, liðið féll út á svekkjandi hátt í umspili gegn Rúmeníu í nóvember.

„Það tók vissulega á, svipað eins og gegn Króatíu árið 2013. Manni leið svipað, þetta var það svekkjandi. Sem betur fer er maður reynslunni ríkari og náði sér fljótt niður og fór að einbeita sér að öðru. Maður getur nýtt sér þetta svekkelsi í að vilja meira og bæta hlutina, það skiptir mestu máli.“

„Ég er mjög spenntur fyrir HM 2022, fyrir að fólk fái að upplifa stemminguna hérna. Þeir ætla að láta þetta vera mót sem allir muna eftir og tala um, þeir hafa hent miklum peningum í þetta. Þeir vilja gera þetta almennilega og ég vil vera partur af þessu móti, það er kjörið tækifæri fyrir okkur að komast á HM. Það væri fínt líka að vera með hús fyrir fjölskylduna.“

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.

Fleiri fréttir

Mest lesið

Nýlegt

433Sport
Fyrir 17 klukkutímum

Beckham tjáði sig um mögulega komu Messi eða Ronaldo til Inter Miami

Beckham tjáði sig um mögulega komu Messi eða Ronaldo til Inter Miami
433Sport
Fyrir 18 klukkutímum

Áhugaverð leikaðferð Traore – Makar á sig barnaolíu

Áhugaverð leikaðferð Traore – Makar á sig barnaolíu
433Sport
Fyrir 21 klukkutímum

Hafa verulegur áhyggjur af Martial – „Hann virðist ekki elska leikinn“

Hafa verulegur áhyggjur af Martial – „Hann virðist ekki elska leikinn“
433Sport
Fyrir 22 klukkutímum

Milljóna tilboð frá Akureyri kom til Breiðabliks

Milljóna tilboð frá Akureyri kom til Breiðabliks
433Sport
Í gær

Liverpool komnir aftur á sigurbraut

Liverpool komnir aftur á sigurbraut
433Sport
Í gær

Stórmeistarajafntefli Chelsea og Manchester United

Stórmeistarajafntefli Chelsea og Manchester United