Burnley tók á móti Manchester United á heimavelli sínum, Turf Moor í ensku úrvalsdeildinni í gær. Jóhann Berg Guðmundsson, var í byrjunarliði Burnley og spilaði allan leikinn.
Eina mark leiksins kom á 71. mínútu. Það skoraði Paul Pogba eftir stoðsendingu frá Marcus Rashford. Skot Pogba hafði örlitla viðkomu í varnarmanni Burnley sem gerði það að verkum að Nick Pope, markvörður Burnley, kom engum vörnum við. Fleiri mörk voru ekki skoruð í leiknum. Sigur Manchester United lyftir þeim upp í efsta sæti deildarinnar þar er liðið með 36 stig, þremur stigum meira en Liverpool sem situr í 2. sæti.
Gary Neville var að lýsa leiknum á Sky Sports en var eitthvað utan við sig í lýsingunni og baðst afsökunar. „Biðst afsökunar á lýsingu minni í kvöld, Stockley Park var út um allt, pródúsentinn var í eyranu hjá mér að segja að Salford hefði skorað á 92 mínútu og United fór á toppinn. Ég verð betri á sunnudag,“ sagði Neville en þá mætast Liverpool og Manchester United.
Gary Neville sem er fyrrum fyrirliði Manchester United var þó í sínu besta skapi eftir leik, hans gamla félag komið á toppinn og heimsækir Liverpool um helgina.
Hann birti myndband af sér að yfirgefa Turf Moor þar sem hann sönglar lagið um sjálfan sig, sem stuðningsmenn Manchester United syngja alltaf. „Gary Neville is a red… is a red… is a red, Gary Neville is a red… He hates Scousers,“ er lagið sem sungið er um Neville.
See ya Sunday 🤪 pic.twitter.com/2PcvZjbSPs
— Gary Neville (@GNev2) January 12, 2021