Kylian Mbappe segir að það að vinna Meistaradeild Evrópu með Paris Saint-Germain sé stærsti draumur hans.
Hinn 22 ára gamli Mbappe hefur verið hjá Parísarliðinu frá árinu 2017. Þá kom hann frá AS Monaco.
Tölfræði Mbappe með PSG er hreint mögnuð. Hann hefur skorað 132 mörk í 171 leik. Þá hefur leikmaðurinn lagt upp 61 mark.
Samningur Frakkans við PSG rennur út næsta sumar. Hann hefur reglulega verið orðaður við Real Madrid. Það er ljóst að það yrði ansi slæmt fyrir PSG að missa þennan stjörnuleikmann frítt frá sér eftir eitt ár.
Miðað við orð Mbappe á dögunum á hann þó eitt stórt verkefni óklárað með PSG.
,,Minn stærsti draumur er að vinna Meistaradeildina með PSG, það yrði stórkostlegt. Að vinna annan heimsmeistaratitil yrði samt frábært líka,“ sagði Mbappe. Hann varð heimsmeistari með franska landsliðinu árið 2018.
