Frönsku risarnir í PSG hafa verið duglegir á félagsskiptamarkaðnum í sumar en félagið hefur krækt sér í fimm nýja leikmenn hingað til. Mauricio Pochettino stjóri félagsins mun væntanlega vilja endurheimta titilinn úr klóm Lille sem vann óvænt deildina í fyrra.
Pochettino mun einnig hafa augastað á Meistaradeildartitlinum en það hefur lengi verið markmið eigenda klúbbsins að verða Evrópumeistarar. Það hafa fá lið í Evrópu nælt sér í fleiri sterkari leikmenn en Parísarbúarnir en þeir Sergio Ramos, Gianluigi Donnarumma, Achraf Hakimi, Georginio Wijnaldum og Danilo Pereira gengu allir til liðs við félagið í sumar.
Það voru einhverjar sögusagnir um að Lionel Messi væri einnig á leið til Parísar en sú reyndist ekki raunin. Messi skrifaði á dögunum undir nýjan samning við Barcelona.
PSG hefur þegar spilað tvo leiki á undirbúningstímabilinu. Þeir unnu Le Mans 4-0 og gerðu 2-2 jafntefli við FC Chambly. Pochettino gaf nokkrum af ungu leikmönnum liðsins tækifæri í leikjunum en margir fastamenn liðsins eru fjarri góðu gamni. Ungstirnið Xavi Simons lék báða leikina gegn Le Mans og FC Chambly og skoraði mark í sitthvorum leiknum.
Pochettino hefur þegar gefið til kynna að það sé mikilvægt að veita ungum leikmönnum tækifæri. „Þetta hafa verið ákafar æfingar í vikunni, sumir leikmenn voru þreyttir en það er mjög mikilvægt að sjá að ungu leikmennirnir okkar eru ólmir í að sanna sig,“ sagði Pochettino. „Það er í mínum verkahring að koma þessum ungu leikmönnum inn í liðið. Landsliðsmennirnir okkar þurfa á hvíld að halda svo að við getum átt gott tímabil. Þeir fara að detta aftur inn.“
PSG munu leika úrslitaleikinn í franska ofurbikarnum gegn Lille þann 1. ágúst næstkomandi. Það vilja eflaust margir fá að sjá ungu efnin í leiknum, en Pochettino segist ekki vera að hugsa um það. ,,Ég er ekkert að spá í það núna,“ sagði hann.
Fram undan er annar vináttuleikur gegn þýska liðinu FC Augsburg.