Þýskaland vann Portúgal í öðrum leik dagsins á EM 2020. Leikið var í Munchen. Leikurinn var liður í F-riðli mótsins.
Þjóðverjar byrjuðu leikinn betur og kom Robins Gosens boltanum í netið á 6. mínútu. Eftir að hafa skoðað VAR dæmdu dómararnir þó markið af vegna rangstöðu.
Portúgal komst yfir, gegn gangi leiksins á 15. mínútu. Þar var að verki Cristiano Ronaldo. Gestirnir geystust af stað í skyndisókn sem lauk með því að Ronaldo skoraði af stuttu færi eftir sendingu frá Diogo Jota.
Heimamenn jöfnuðu á 35. mínútu. Ruben Dias stýrði þá fyrirgjöf Gosens, sem var frábær í leiknum, í eigið mark.
Það var annað sjálfsmark sem gaf Þjóðverjum forystuna stuttu síðar. Þá setti Raphael Guerreiro boltann í eigið net. Þýskaland leiddi verðskuldað í hálfleik, 2-1.
Heimamenn gengu frá leiknum á fyrsta stundarfjórðungi seinni hálfleiks. Fyrst skoraði Kai Havertz af stuttu færi á 51. mínútu eftir sendingu frá títtnefndum Gosens.
Það var svo viðeigandi að Gosens skoraði fjórða mark Þjóðverja sjálfur á 60. mínútu. Hann skoraði með flottum skalla eftir fyrirgjöf frá Joshua Kimmich.
Diogo Jota tókst að minnka muninn fyrir Portúgal á 67. mínútu. Þeir náðu þó ekki að fylgja því eftir til að hleypa spennu í leikinn. Lokatölur 4-2 fyrir Þýskaland.
Nú hafa öll liðin í F-riðli leikið tvo leiki. Frakkar eru efstir með 4 stig, Þjóðverjar og Portúgalir eru með 3 stig og Ungverjar með 1 stig.