Sergio Aguero er sagður vera ósáttur við Pep Guardiola og hvernig staðið var að brottför hans frá Manchester City.

Sergio Aguero sem er markahæsti leikmaður Manchester City frá upphafi kvaddi Etihad og stuðningsmenn í gær eftir 10 ár hjá klúbbnum. Leikmaðurinn kom inn á sem varamaður og skoraði tvívegis og með því bætti hann met Wayne Rooney. Aguero er því sá leikmaður sem skorað hefur flest mörk fyrir eitt félag í ensku úrvalsdeildinni.

Samkvæmt The Athletic töluðu Aguero og Guardiola ekki saman í nokkrar vikur í mars. Aguero er sagður vera ósáttur við Pep þar sem hann vildi ekki bjóða honum nýjan samning í sumar og þetta særði Aguero. Sambandið á að hafa verið svo slæmt að þeir félagarnir töluðust ekki við í marsmánuði.

Þá segir einnig í frétt The Athletic að Aguero hafi verið tilbúinn að spila síðustu vikur og loksins laus við meiðsli en Guardiola leyfði honum samt ekki að spila mikið.

Þeir félagar virtust þó mestu mátar í fögnuði liðsins eftir leik í gær og þetta hafði Guardiola að segja um argentíska framherjann:

„Við elskum hann svo mikið,“ sagði Guardiola við Sky Sports með tárin í augunum.

„Hann er svo yndislegur. Við munum ekki fá neinn eins og hann.“