„Mér fannst við vinna okkur aðeins betur inn í leikinn, seinni hálfleikur var aðeins betri. Þeir eru góðir að halda boltanum, erfitt að fá tvö mörk á sig í byrjun,“ sagði Aron Einar Gunnarsson fyrirliði Íslands eftir tapið gegn Þýskalandi í kvöld við RÚV.

Íslenska liðið tapaði 3-0 á útivelli en þýska liðið komst í 2-0 forystu eftir sjö mínútna leik. Aron segir að það hafi verið kjaftshögg.

„Það tók vindinn úr okkur, svekkjandi að ná ekki að klukka þá betur. Eitthvað það best spilandi lið sem ég hef spilað á móti í góðan tíma,“ sagði Aron Einar.

Aron segir að mistök hafi átt sér stað í fyrstu tveimur mörkunum sem Ísland fékk á sig í þessum fyrsta leik í undankeppni HM.

„Klúður hjá okkur, aðeins of varnarsinnaðir. Töpuðum boltanum á hættulegum stað í seinna markinu og okkur er refsað, þá er þetta erfitt gegn liði sem finnst gott að halda boltanum. Mér fannst við mæta þeim meira af krafti í seinni hálfleik, auðveldara að spila pressulaust en mér fannst við gera það betur.“

„Í fyrra markinu erum við ekki búnir að snerta boltann, boltinn dettur alveg fyrir hann og hann klárar færið vel. Það sló okkur aðeins út af laginu, við getum gert miklu betur en við gerðum í dag.“