Það vakti talsverða athygli þegar af því bárust fréttir í vikunni að Arnar Þór Viðarsson landsliðsþjálfari og Eiður Smári Guðjohnsen aðstoðarmaður hans hefðu tekið fullan þátt í æfingu íslenska landsliðsins í Þýskalandi.

Íslenska liðið hefur leik í undankeppni HM í kvöld þegar liðið mætir Þýskalandi á útivelli. Á þriðjudag, tveimur dögum fyrir leik tóku þjálfarar liðsins þátt í æfingu liðsins. Lars Lagerback stýrði þá æfingunni. „Þjálfararnir Arnar Þór Viðarsson og Eiður Smári Guðjohnsen tóku hinsvegar báðir þátt í æfingunni í dag sem leikmenn, Eiður Smári mun meira,“ sagði í frétt Fótbolta.net um málið.

Málið var rætt í hlaðvarpsþættinum, Dr. Football í gær. „Það er ekkert eðlilegt við þetta, þeir hefðu bara getað boðað fleiri í hópinn. Menn sem eru í formi og vinna við að spila fótbolta,“ sagði Kristján Óli Sigurðsson, sérfræðingur þáttarins.

Sigurður Heiðar Höskuldsson, þjálfari Leiknis var einnig í þættinum og hann segir að margir hafi furðað sig á þessu. „Ég hoppa í reit af og til þegar ég er í stuði, mér fannst þetta mjög skrýtið. Þetta stakk marga í augun ,“ sagði Sigurður Heiðar.

Arnar og Eiður Smári áttu frábæra ferla sem leikmenn og voru lengi vel í stóru hlutverki í íslenska landsliðinu, Eiður Smári er markahæsti leikmaður í sögu landsliðsins og Arnar átti mjög svo farsælan feril í Belgíu.

Arnar Þór, Eiður Smári og Lagerback eru að stýra sínum fyrsta leik saman í kvöld en leikurinn hefst 19:45 í Þýskalandi.