Það er talið líklegt að Jurgen Klopp stjóri Liverpool reyni að styrkja lið sitt nokkuð hressilega í sumar, þýski stjórinn þarf að hressa upp á leikmannahóp sinn að margra mati.

Veðbankar í Englandi telja ansi líklegt að Klopp leggi mikla áherslu á að kaupa Dayot Upamecano varnarmann RB Leipzig. Franski varnarmaðurinn gæti myndað ansi sterkt teymi með Virgil Van Dijk.

Jamie Carragher sérfræðingur Sky Sports telur að Liverpool þurfi að kaupa þrjá leikmenn í sumar. Englandsmeistarar Liverpool hafa ekki verið upp á sitt besta á þessu tímabili. Liðið tapaði fyrir Manchester City 4-1 um helgina og vonir liðsins um að verja titil sinn eru litlar. „Það þarf að kaupa miðvörð, mann til að fylla skarð Georgino Wijnaldum og svo þarf einn til að koma inn í sóknarlínuna,“ sagði Carragher.

Veðbankar í Bretlandi telja að tveir miðjumenn séu á lista Klopp, ensk blöð hafa fjallað um áhuga liðsins á Raphinha miðjumanni Leeds. Sá hefur verið frábær á þessu tímabili í ensku úrvalsdeildinni.

Þá er Pedro Goncalves leikmaður Sporting Lisbon sagður á lista, ensk blöð hafa sagt frá því að Liverpool hafi skoðað möguleika á því að kaupa hann í janúar.

Líklegir til Liverpool í sumar:

Dayot Upamecano

Raphinha

Pedro Goncalves