Kasia Lenhardt 25 ára fyrirsæta í Þýskalandi fannst látin í íbúð sinni í Berlín í gær. Vika er síðan að Lenhardt og Jerome Boateng leikmaður FC Bayern greindu frá skilnaði sínum.

Lenhardt er fædd í Póllandi en skilnaður þeirra var mikið í fréttum, hún hafði verið sökuð um að reyna að svíkja af honum fé. Kasia átti einn son úr fyrra sambandi en þessi 25 ára stúlka og Boateng höfðu verið saman í tæpa 15 mánuði þegar leiðir skildu.

Kasia sagði eftir skilnað þeirra að Boateng væri djöfullinn sjálfur, hún hafði lofað því að segja sína sögu þegar hún hefði náð að jafna sig á sambandsslitunum.

Boateng ákvað að slíta sambandinu í upphafi árs þegar Kasia hafði klessukeyrt bifreið hans undir áhrifum áfengis. „Kasia varð unnusta mín eftir að hafa náð að slíta mig frá fyrrum unnustu minni,“ sagði Boateng í síðustu viku

„Ég ákvað að standa með Kasia og reyndi að láta það ganga, Kasia vildi að við myndum gera sambandið opinbert. Kasia hótaði mér oft á meðan sambandi okkar stóð, hún hótaði að stúta ferli mínum og koma í veg fyrir að ég gæti hitt börnin mín.“

„Kasia sagðist ætla að saka mig um að hafa lamið sig, hún vissi að móðir barnanna minna hefði ásakað mig um það. Kasia hafði samband við hana og sagðist ætla að hjálpa henni fyrir dómi.“

Boateng hefur lengi leikið með FC Bayern en hann varð Heimsmeistari með Þýskalandi á sínum tíma og lék einnig með Manchester City.