Fyrsti leikurinn í fjórðu umferð enska deildarbikarsins var spilaður í gær. Tottenham hafði betur gegn Chelsea eftir vítaspyrnukeppni. Staðan eftir venjulegan leiktíma var 1-1 og því var farið í vítaspyrnukeppni.
Timo Werner skoraði fyrsta mark leiksins fyrir Chelsea á 19. mínútu. Chelsea var með yfirhöndina allt þar til á 83. mínútu. Érik Lamela jafnaði þá metin fyrir Tottenham og tryggði þeim vítaspyrnukeppni. Þar hafði Tottenham betur. Vítaspyrnurnar voru öruggar hjá báðum liðum þar til Mason Mount fór á punktinn fyrir Chelsea. Hann hitti ekki á markið og sigur Tottenham því staðreynd.
Atvik leiksins átti sér hins vegar stað þegar rúmar tíu mínútur voru eftir af leiknum. Eric Dier varnarmaður Tottenham rauk þá af velli þegar hann þurfti nauðsynlega á klósettið.
Allir voru meðvitaðir um að Dier hefði þurft á klósettið en þegar Chelsea fór að nýta sér liðsmuninn fékk stjóri Tottenham nóg. Þegar Chelsea hafði fengið dauðafæri rauk Jose Mourinho stjóri Tottenham inn í klefa og öskraði á Dier að koma sér út á völlinn.
„Mourinho var ekki glaður en það var ekkert sem ég gat gert. Náttúran kallaði,“ sagði Dier eftir klósettferðina og sigurinn.
„Ég heyrði að þeir hefðu fengið gott færi, ég var þakklátur fyrir að þeir hafi ekki náð að skora.“
Mourinho hafði gaman af atvikinu eftir leik. „Dier gat ekkert annað gert, þetta er eðlilegt þegar líkamanum vantar vökva. Ég vissi hvað hann væri að gera en ég ákvað að setja pressu á hann að koma aftur. Hann var frábær í leiknum,“ sagði stjórinn frá Portúgal.
Enski boltinn á 433 er í boði 
