Jóhann Berg Guðmundsson verður einhverjar vikur á sjúkrabekknum ef marka má orð Sean Dyche stjóra Burnley. Jóhann var borinn af velli með súrefnisgrímu eftir ljóta tæklingu í leik liðsins gegn Sheffield United í enska deildarbikarnum í gær.

Um var að ræða fyrsta leik tímabilsins en Jóhann var borinn af velli eftir tíu mínútna leik. „Þetta var mjög ljót tækling og hefði átt að vera rautt spjald,“ sagði Dyche eftir leik.

Meira:
Sjáðu subbulega tæklingu sem Jóhann Berg varð fyrir í gær

Þegar tæklingin kom snéri Jóhann upp á hné sitt og líklega hafa liðböndin tognað eða skaddast. „Hann snéri upp á það og þetta verða því miður ekki bara nokkrir dagar.“

Þessi tíðindi frá Sean Dyche virðast staðfesta það að Jóhann Berg verður ekki með íslenska landsliðinu þegar það mætir Rúmeníu í byrjun október í umspili um laust sæti á EM.

Jóhann var meiðslum hrjáður á síðustu leiktíð en var leikfær undir lok síðustu leiktíðar og æfði vel í sumar. „Hann hefur litið vel út, hann hefur verið frískur en þetta er enn einn leikmaðurinn sem við missum út.“

Enski boltinn á 433 er í boði