Óskar Hrafn Þorvaldsson, þjálfari Breiðabliks, var í raun öskuillur í viðtali við Stöð 2 Sport í kvöld eftir leik við FH.
Blikar þurftu að sætta sig við eitt stig á heimavelli í leik sem lauk með 3-3 jafntefli í Kópavogi.
Óskar viðurkennir að hann sé hundfúll með frammistöðuna og vildi meira frá sínum mönnum.
,,Ég er bara hundfúll. Ég lít á þetta sem tvö töpuð stig, við áttum að vera löngu búnir að klára þetta. Hreint og beint ömurlegt hjá okkur að loka ekki þessum leik,“ sagði Óskar við Stöð 2 Sport.
,,Við erum ekki þreyttir, við keyrðum á fullri ferð í 90 mínútur í dag, það er engin þreyta sem afsakar þetta. Menn æfa allan veturinn til að vera klárir í svona, æfing tvisvar á dag skiptir engu máli. Þetta er hugarfar.“
,,Það er ekki í boði að afsaka þetta með þreytu. Þetta var bara lélegt, einstaklingsmistök í vörn og við tókum ekki færin okkar. Það var fullt af stöðum sem við áttum að gera betur í, ég er bara hundfúll.“
Damir Muminovic fékk dæmda á sig vítaspyrnu í seinni hálfleik og segir Óskar að tækling varnarmannsins hafi verið heimskuleg.
,,Ég gæti örugglega skrifað BA ritgerð um dómgæsluna á mótinu til þessa en þetta var bara heimskulegt hjá Damir. Þú veður ekki á 300 kílómetra hraða í mann sem er með boltann inn í teig.“