Xherdan Shaqiri, leikmaður Liverpool, hefur svarað fyrir sig eftir gagnrýni Arno Rossini á dögunum sem gagnrýndi hann heiftarlega.
Rossini er þjálfari í Sviss en hann gagnrýndi Shaqiri og sagði hann ekki vera sigurvegara þrátt fyrir sigur Liverpool í ensku úrvalsdeildinni.
Það var svissnenska blaðið Blick sem birti viðtalið en Shaqiri kom lítið við sögu á þessu tímabili og sagði Rossini að leikmaðurinn væri bara áhorfandi.
Vængmaðurinn svaraði þó fyrir sig á Instagram og skaut þar á bæði blaðið og Andreas Boeni sem sér um útgáfu þess.
,,Kæra Blick og Andreas Boeni. Á meðan ykkur hefur leiðst á skrifstofunni þá er hérna mynd fyrir næsta blað,“ skrifaði Shaqiri.
Myndin umtalaða er af leikmönnum Liverpool þar sem þeir lyfta deildarmeistaratitlinum.