FH hefur ekki áhuga á því að fá Sam Hewson frá Fylki og hefur félagið ekki skoðað það. Fram kom í upphitunarþætti á Stöð2 Sport í gær að FH hefði áhuga á að fá Hewson aftur í sínar raðir.
Hewson lék með FH frá 2014 til 2016 en hefur síðan þá spilað með Grindavík og Fylki. „Það er ekkert til í þessu og hefur ekkert verið rætt,“ sagði Ólafur Kristjánsson þjálfari FH í samtali við 433.is í dag.
Hann kveðst vel settur af miðjumönnum. „Við erum með feikilega öfluga miðjumenn i okkar hóp, Björn Daníel, Baldur, Daníel Hafsteins, Þóri Jóhann og Baldur Loga. Svo kemur Vuk til okkar í sumar,“ sagði Ólafur en FH hefur keypt Vuk Oskari Dimitrijevic frá Leikni og á hann að koma til félagsins í júlí.
FH hefur látið að sér kveða á félagaskiptamarkaðanum en Pétur Viðarsson tók fram skóna í fyrradag. „Ég lagði mikla áherslu á að fá Pétur inn aftur, hann er búinn að vera í FH síðan elstu menn muna og er sigurvegari. Okkur vantaði breidd í vörnina og þá sest maður niður með Pétri. Hann vill keyra FH áfram og hann er alltaf í góðu standi.“
FH festi svo kaup á Herði Inga Gunnarssyni frá ÍA í gær. „Við höfðum reynt að fá Hörð í vetur og þá var það ekki í boði, það kom bara nei frá ÍA. Svo fer þetta aftur af stað og það var meistaraflokksráðið hjá okkur og Geir framkvæmdarstjóri ÍA sem ræða málið. Ég lagði mikla áherslu á að fá hann.“
Með þessu eykst breiddin í hópi FH og það sagði Ólafur mikilvægt. „Það er hugsunin með þessu að það sé samkeppni um allar stöður, þú ert með Lennon, Jónatan, Morten Beck og Atla Guðna. Í vörninni ertu svo með Guðmann, Guðmund Kristáns, Pétur, Brynjar Ásgeir, Þórð Þorstein, Hörð, Hjört Loga og unga stráka. Svo ertu með Davíð og Gunna Nielsen í markinu. Svo þessa miðjumenn sem ég ræddi áðan. Það þarf samkeppni í allar stöður.“