Það vakti athygli á síðasta ári þegar Ólafur Kristjánsson þjálfari FH í Pepsi Max-deild karla hafnaði stóru starfi í Danmörku.
Ólafi var boðið að taka við þjálfun Esbjerg sem leikur í efstu deild þar í landi. Ólafur hefur reynslu af þjálfun í Danmörku eftir að hafa starfað hjá Nordsjælland og Randers.
Ljóst er að Ólafur hefur gott orðspor þar í landi og misjafnt gengi með FH hafði ekki áhrif á það að danska liðið vildi Ólaf aftur út.
„Ég skuldbatt mig við FH þegar ég kom á sínum tíma. Ég er og hef verið með liðið úti í miðri á og ætla mér að komast yfir þá á. Ég er trúr þegar kemur að þessum hlutum,“ sagði Ólafur í samtali við Hjörvar Hafliðason í Dr. Football i gær.
Ólafur er á leið inn í sitt þriðja tímabil með FH eftir að hann kom heim frá Danmörku.