,,LÖGREGLAN í Reykjavík lýsir eftir 13 ára pilti, Stefáni Loga Magnússyni. Hann fór af heimili sínu seint á sunnudagskvöld en hefur síðan þá haft samband við kunningja sína. Stefán Logi er 160 sm að hæð, grannvaxinn, brúnhærður og stuttklipptur. Hann var í bláum gallabuxum, dökkblárri hettuúlpu og svörtum skóm þegar hann fór að heiman. Lögreglan biður þá sem kunna að hafa orðið varir við Stefán Loga að láta vita í síma 11166,“ svona hljómar tilkynning frá Lögreglunni í Reykjavík árið 1993 þegar leitað var af Stefáni Loga Magnússyni, hann hafði þá strokið af heimili sínu tveimur dögum áður.
Stefán átti síðar eftir að ná langt sem knattspyrnumaður, samdi við stórliðið FC Bayern og lék fyrir íslenska landsliðið.
Stefán ræðir þetta mál við Fótbolta.net í dag og fer yfir erfitt samband sitt við föður sinn, á þessum árum. ,,Við vorum mjög líkir og áttum erfitt skap saman. Svo komu upp aðstæður sem gerðu það að verkum að mér fannst ég þurfa að fara að heiman,“ sagði Stefán við Fótbolta.net.
Stefán upplýsti hvar hann faldi sig og hvernig hann flúði undan lögreglu.
„Auðvitað var þetta mjög erfitt fyrir mína nánustu en það væsti ekkert um mig allan tímann. Ég faldi mig inni í bílskúr hér og þar og fékk mat hjá góðu fólki. Ég fór líka inn hjá frændfólki sem ég vissi að var ekki heima. Svo var þetta komið gott að lokum þegar ég var farinn að hlaupa undan lögreglunni. Ég hljóp í nokkur skipti undan lögreglunni og þetta var nánast eins og í bíómynd.“