Aron Einar Gunnarsson fyrirliði Íslands segir leikmenn liðsins vera svekkta með þá ákvörðun Erik Hamren að láta af störfum sem þjálfari liðsins. Hamren greindi frá því í morgun að hann ætlaði sér að hætta eftir leikina tvo í Þjóðadeildinni.
Markmið Hamren var að koma Íslandi á Evrópumótið næsta sumar og þegar það mistókst á fimmtudag, ákvað hann að láta af störfum.
„Það hefur verið virkilega gaman og erfitt, ekki erfitt að vinna með honum. Erfitt fyrir hann að koma inn í þennan hóp sem hefur verið að ganga í gegnum mikil meiðsli. Hann hefur ekki fengið mikinn spiltíma frá flest öllum, hann hefur bætt okkur mikið. Hann og Freysi hafa lagt mikið á sig í þessum verkefnum, þetta hefur verið skrýtið í gegnum COVID. Þeir voru að undirbúa umspils leiki sem þeir vissu aldrei hvenær yrðu spilaðir. Það hefur mikið verið á móti honum,“ sagði Aron Einar á fundinum.
Aron segir frábært að vinna með honum og leikmenn Íslands séu svekktir að sjá hann fara.
„Samstarfið milli hans og leikmanna hefur verið gott, hann veit hvernig okkur líður með það að hann sé að hætta. Hann er frábær í mannlegum samskiptum sem þjálfari, við erum svekktir með hann hafi tekið þessa ákvörðun.“
„Lífið heldur áfram og við þurfum að einbeita okkur að næstu undankeppni fljótlega. Það verður að virða hans ákvörðun að taka þetta skref, okkar samstarf hefur verið virkilega gott. Ég vil þakka honum fyrir hans störf, það er svekkjandi að komast ekki inn á þriðja stórmótið í röð með hann við stjórnvölin.“
Hamren tók við landsliðinu eftir HM 2018 og ætlaði sér að koma liðinu á EM, eftir að það mistókst ákvað hann að láta af störfum.