Bjarni Guðjónsson aðstoðarþjálfari KR sagði á Stöð2 Sport í gær að möguleiki væri á að Íslandsmótin í knattspyrnu yrðu blásin af. KSÍ ákvað að fresta mótahaldi til 19 október vegna kórónuveirunnar en Bjarni taldi líkur á því að allt verði blásið af.
Talsverð umræða hefur verið um það að mótin verði blásin af vegna veirunnar og samkvæmt heimildum 433.is er fjöldi leikmanna sem vill að mótin verði blásin af.
„Hann var ekki að henda þessu fram nema að það væru miklar líkur á þessu,“ sagði Hjörvar um þau orð Bjarna sem er vel tengdur knattspyrnuhreyfingunni.
Mikael Nikulásson sérfræðingur Dr. Football telur að Bjarni viti ekki neitt um málið. „Ég held að Bjarni Guðjónsson viti ekkert um þetta frekar en ég eða þú. Það vilja öll liðin í Pepsi Max-deildinni hætta þessu nema KR og kannski Fylkir. KR er væntanlega eina liðið sem vill halda áfram.“
KR myndi missa af Evrópusæti ef mótið yrði blásið af en Breiðablik, FH og Stjarnan myndu fá Evrópusæti og Valur yrði Íslandsmeistari. Búið er að klára 2/3 af mótinu og samkvæmt reglum KSÍ má blása mótið af og krýna meistara.
„Við erum á Íslandi og mótið á að byrja í apríl næsta, auðvitað verður mótið klárað. Ég held að Bjarni sé að setja netta pressu á að þetta verði ekki,“ sagði Mikael.
Hjörvar Hafliðason vonar að fólki detti ekki í hug að blása mótið af. „Ég trúi ekki að það detti þetta einhverjum í hug að blása mótið af.“