Alexander Hleb, fyrrum leikmaður Arsenal og Barcelona, segist hafa grátið þegar hann ræddi við Arsene Wenger, þáverandi knattspyrnustjóra Arsenal áður en hann gekk til liðs við Barcelona árið 2008.

„Ég grét þegar að ég talaði við Wenger. Við töluðum saman í fríinu áður en ég fór frá Arsenal. Hann sagðist vilja halda mér hjá félaginu og að ég væri mikilvægur hluti af liðinu. Ég bara grét, ég vissi ekki hvað ég átti að gera á þessum tíma,“ sagði Hleb í hlaðvarpinu In Lockdown.

Hleb lék á sínum tíma 130 leiki fyrir Arsenal og var elskaður meðal stuðningsmanna félagsins. Barcelona keypti Hleb á 13.5 milljónir punda.

Hjá Barcelona vann Hleb allt sem var í boði, spænsku deildina og Meistaradeild Evrópu þar á meðal. Hins vegar spilaði hann aðeins 19 leiki á fjórum árum hjá félaginu. Hann segist ekki vera viss um að félagsskiptin til Barcelona hafi verið góð ákvörðun.

„Ég skil ekki enn þá hvað gerðist á þessum tíma og afhverju ég tók þá ákvörðun að yfirgefa Arsenal. Barcelona var að sjálfsögðu besta lið í heiminum á þessum tíma en ég var samt sem áður mjög ánægður hjá Arsenal,“ sagði Hleb.