Traoré, sem er einn hraðasti leikmaður heims, hefur áður verið sterklega orðaður við Liverpool. Til að mynda bjuggust margir við að hann myndi ganga til liðs við liðið í síðasta félagsskiptaglugga en að lokum var það liðsfélagi Traoré, Diogo Jota, sem fór til Liverpool.
Klopp hefur þó ekki misst vonina þegar kemur að því að fá Traoré til Bítlaborgarinnar. Samkvæmt Mundo Deportivo vill Klopp fá Traoré til Liverpool í janúar, einnig er sagt að hann sé að þrýsta á stjórn félagsins að kaupa hann.
Ef Traoré fer frá Wolves þá fer hann ekki fyrir lítinn pening en Wolves vill fá 60 milljónir punda fyrir þennan 24 ára gamla leikmann. Þá hefur Traoré einnig verið orðaður við Barcelona en fór þaðan til Aston Villa árið 2015. Eftir eitt ár í Aston Villa fór Traoré til Middlesbrough og eftir það til Wolves.
Þegar Liverpool spilaði við Wolves í fyrra stóð Traoré sig afar vel og ákvað Klopp að hrósa honum fyrir frammistöðu sína. „Það er ekki hægt að spila á móti honum á köflum, hann er ótrúlegur. Þvílíkur leikmaður – hann er ekki einn á vellinum en hann er svo góður,“ sagði Klopp eftir leikinn.