Davíð Smári Lamude, þjálfari Kórdrengja, var gestur í hlaðvarpsþætti Fótbolta.net í dag og fór þar yfir ýmis mál.
Kórdrengir eru félag sem flestir eru farnir að kannast við en liðið mun leika í 2. deildinni næsta sumar eftir að hafa komist upp tvö ár í röð úr bæði 4 og 3 deild.
Það eru reynslumiklir leikmenn á mála hjá Kórdrengjum og má nefna Einar Orra Einarsson og Albert Brynjar Ingason.
Hafliði Breiðfjörð ræddi ítarlega við Davíð um klúbbinn sem er ekki með neina yngri flokka eins og staðan er.
Það er þó planið að breyta því í framtíðinni og segir Davíð að stefnan sé á að byrja með einn flokk og vinna sig upp.
,,Ég hugsa að okkar hugmynd núna sé að byrja á einum flokki. Planið er að byrja á einum flokki og vera með frí æfingagjöld,“ sagði Davíð.
,,Við viljum reyna að laða fólk að. Leigan á vellinum er mjög dýr og við þurfum einhvern veginn að ná samkomulagi þannig það veltur svolítið á því líka. Við erum að borga gríðarlegar upphæðir mánaðarlega fyrir að æfa þarna fimm sinnum í viku.“
,,Við ættum að fá á móti styrk frá KSÍ ef við byrjum með yngri flokka starf, þetta er eitthvað sem einhverjir tölvugúrúar þurfa að liggja yfir.“
,,Ég held að við myndum byrja á yngsta flokknum. Ég hef ekki sjálfur verið mjög inn í því en við höfum rætt við þjálfara hvort þeir séu tilbúnir að koma, svörin hafa verið jákvæð.“