Tottenham er á barmi þess að fá Gareth Bale og Sergio Reguilon frá Real Madrid en félagaskiptin ættu að ganga í gegn á morgun.
Manchester United hafði síðustu daga rætt við Real Madrid um kaup á vinstri bakverðinum Reguilon. United vildi hins vegar ekki setja klásúlu um að Real Madrid gæti keypt hann til baka.
Tottenham gekk að þeim kröfum Real Madrid og er Reguilon því að ganga í raðir Tottenham eftir vel heppnaða dvöl hjá Sevilla á síðustu leiktíð. Gareth Bale er svo á leið til Tottenham á láni frá Real Madrid, búið er að ná samkomulagi um slíkt.
Reguilon og Bale fara í hluta af læknisskoðun sinni í Madríd í dag áður en þeir fara saman í einkaflugvél til London á morgun.
Þeir ættu báðir að krota undir hjá Tottneham á morgun en verða ekki leikfærir fyrr en í næstu viku.
