Aga- og úrskurðarnefnd KSÍ hefur dæmt Atla Steinar Ingason, leikmann Skallagríms sem leikur í 4. deild karla í knattspyrnu, í fimm leikja bann. Ástæða bannsins er kynþáttaníð sem Atli beitti Gunnar Jökul Johns, leikmann Berserkja, en liðin spiluðu gegn hvort öðru síðastliðinn föstudag. Þá þarf Skallagrímur einnig að greiða 100 þúsund króna sekt vegna málsins. RÚV greinir frá þessu.
Páll Snævar Brynjarsson skrifaði greinargerð fyrir hönd knattspyrnudeildar Skallagríms vegna málsins en greinargerðina má sjá í skýrslu KSÍ um málið. „Þetta atvik og öll umræða í kjölfar hennar hefur reynt mjög á leikmenn og þjálfara Skallagríms, en hópurinn hefur staðið þétt saman,“ segir í greinargerðinni.
„Það er vissulega líka sárt að horfa upp á leikmanns liðsins brjóta af sér á óafsakanlegan hátt, en við treystum því að aganefnd KSÍ taki á þessu máli með viðeigandi og sanngjörnum hætti. Við vonumst jafnframt til þess að leikmaðurinn sem í hlut á læri af biturri reynslu, þiggi aðstoð og nýti væntanlegt keppnisbann til að vinna úr sínum málum.“
Einar Guðnason, sem hefur leikið lengi með Skallagrím og einnig séð um þjálfun, greindi frá atvikinu á Twitter síðu sinni skömmu eftir að það átti sér stað. Í kjölfarið ræddi Fótbolti.net við Viktor Huga, þjálfara Berserkja, um málið.
„Ég var á hliðarlínunni og var því ekki í hitanum en það sem strákarnir segja mér og vinir okkar í Skallagrími eru sammála okkur þá varð smá hiti og einhverjar tæklingar. Í kjölfarið snýr leikmaður númer fimmtán í Skallagrími [Atli Steinar Ingason] sér við og segir ‘drullastu heim til Namibíu’ við Gunnar Jökul Johns, leikmann okkar,“ sagði Viktor. ,,Kormákur Marðarson, leikmaður okkar, hafði heyrt fimm mínútum áður, sama einstakling númer 15 kalla Gunnar ‘apakött’. Kormákur spurði númer 15 hvað kallaðiru hann og hann endurtók ‘apaköttur’. Þetta er leiðinlegt mál.“