Kiko Casilla, markvörður Leeds United, hefur verið dæmdur í átta leikja bann af enska knattspyrnusambandinu.

Frá þessu var greint í kvöld en Casilla er dæmdur fyrir kynþáttaníð í garð sóknarmannsins Jonathan Leko.

Leko er aðeins 20 ára gamall framherji Charlton en hann hefur spilað með liðinu á láni.

Charlton vann 1-0 sigur á Leeds í september og átti atvikið sér þá stað. Casilla var einnig sektaður um 60 þúsund pund.

Spánverjinn þarf líka að fara á námskeið til að bæta hegðun sína og hefur tíma til þess á næstu vikum.

Leeds er í harðri baráttu um að komast upp í úrvalsdeildina og er þetta ákveðinn missir fyrir liðið.