Jóhann Berg Guðmundsson, leikmaður Íslands, lagði upp fyrra mark Íslands í kvöld er liðið vann 2-1 sigur á Tyrkjum.
Sigurinn var frábær hjá íslenska liðinu og var Jóhann að vonum sáttur í leikslok.
,,Þetta var mjög solid hjá okkur. Auðvitað þegar þeir ná þessu eina marki inn þá kemur smá stress og þeir fá eitt færi eftir það en annars var ekki mikið að gerast. Svipað og í Albaníuleiknum,“ sagði Jóhann.
,,Hefðu þeir ekki náð þessu marki inn þá hefðum við skorað fleiri og pakkað þeim saman.“
,,Við fengum aukaspyrnu aðeins á undan og Gylfi tók hana. Okkur fannst línan svo há en svo vorum við komnir aðeins nær markinu og ég ákvað að taka þetta. Ég setti hann á hættulegan stað og Raggi var mættur.“
,,Ég hef verið betri en ég bjóst ekki við að ná svona löngum spiltíma. Í endann var ég gjörsamlega búinn. Ég er búinn að æfa kannski tvisvar og það var ekki mikið eftir á tankinum.“