Ansi undarlegt atvik átti sér stað í Svíþjóð á dögunum er Degerfors og Osters áttust við í næst efstu deild.
Í síðari hálfleik ákvað Degerfors að gera breytingu og kom Mattias Ozgun inná í stað Axel Lindahl.
Eins og venjan er þá tókust þeir í hendur á hliðarlínunni en Lindahl var heldur kærulaus er hann tók á móti Ozgun.
Því miður fyrir Ozgun þá potaði Lindahl óvart ansi harkalega í auga hans sem varð til þess að hann gat ekki tekið þátt.
Ozgun gat aðeins verið á vellinum í örfáar sekúndur og náði ekki að snerta boltann því hann sá ekki neitt.
Hann þurfti á læknisaðstoð að halda og var svo ákveðið stuttu seinna að hann þyrfti að fara strax aftur af velli.