Liverpool vann góðan sigur á Everton í gær, á heimavelli sínum. Liverpool vann 5-2 sigur og hefur liðið aðeins tapað tveimur stigum á tímabilinu, allt stefnir í að félagið vinni ensku deildina í fyrsta sinn í 30 ár.
Talsvert öngþveiti skapaðist fyrir utan völlinn í gær en umferð í kringum Anfield var hægari en nokkur sinni fyrr.
Á því eru skýringar en lögreglan þurfti að hafa afskipti af strípaling sem hljóp um nágrenni vallarins. ,,Ég trúði ekki því sem ég var að sjá,“ sagði einn aðili sem sá strípalinginn á hlaupum.
,,Ég taldi að hann væri í einhverjum búning, hann hljóp svo framhjá bílnum mínum og fór að stoppa umferð.“
,,Hann setti lim sinn ofan á húddið á nokkrum bílum, ég hef aldrei séð svona áður.“
Lögreglan gómaði manninn og var hann færður á spítala í borginni áður en hann var færður í lögregluklefa.