Eins og við sögðum frá í vikunni þá var það umdeild ákvörðun hjá stjórn knattspyrnudeildar FH að færa fjármuni af reikningum Barna og Unglingaráðs, yfir í meistaraflokk félagsins til að gera upp skuldir við leikmenn. Barna og unglingaráð vildi ekki lána þessa fjármuni sem náð var í, ráðið sagði af sér vegna málsins.

FH hefur skuldað leikmönnum sínum talsverðar fjárhæðir síðustu mánuði og mikið verið fjallað um málið. Fjallað var um málið í Dr. Football í dag en þar er fullyrt að Atli Viðar Björnsson, fyrrum leikmaður félagsins eigi inni einhverjar milljónir hjá félaginu.

Atli Viðar hætti í FH fyrir meira en ári síðan. ,,Ég hef fengið 93 ábendingar um að Atli Viðar eigi inni pening hjá FH,“ sagði Hjörvar Hafliðason, stjórnandi þáttarins.

Kristján Óli Sigurðsson, sérfræðingur þáttarins segir að Atli Viðar hafi ætlað í málaferli við FH. ,,Skýrslan er þannig, hann var á leiðinni í málaferli við félagið. Þetta hleypur á einhverjum milljónum, það náði að stoppa þessi málaferli í bili. Ég væri búinn að heyra ef greiðslur væru komnar.“

,,Þetta er grafalvarleg staða,“ sagði Hjörvar Hafliðason um málefni FH-inga.

FH hefur gefið út að gert verði upp við leikmannahóp félagsins fyrir jól, Mikael Nikulásson telur að það muni nást. ,,Ég held að þeir nái að klára launin hjá leikmönnum fyrir jól en hvort þeir nái að gera upp við þá sem eru hættir, veit ég ekki um.“

Pepsi Max deildin á 433 er í boði