Einar Þór Sigurðsson skrifar frá Istanbúl:
Senol Gunez, þjálfari Tyrkja, er sá stjóri sem náð hefur hvað bestum árangri með tyrkneska landsliðið af öllum stjórum. Leikurinn gegn Íslandi annað kvöld verður hans 61. með landsliðið en hann tók við liðinu á nýjan leik á þessu ári eftir að hafa stýrt því frá árinu 2000 til 2004.
Gunes hefur stýrt Tyrkjum í 16 leikjum í Evrópukeppnum; þar hafa tólf leikir unnist, tveir endað með jafntefli og tveir tapast. Undir hans stjórn hafa Tyrkir fengið 2,38 stig að meðaltali úr hverjum leik en Fatih Terim kemur þar á eftir með 1,9 stig að meðaltali. Undir stjórn Gunes hafa Tyrkir unnið 31 leik, 14 hafa endað með jafntefli og fimmtán leikir hafa tapast.
Gunes er ákaflega reyndur stjóri og í miklum metum hjá Tyrkjum, enda hefur hann snúið við blaðinu eftir mörg mögur ár hjá landsliði Tyrkja. Hann stýrði Besiktas á árunum 2015 til 2019 og gerði liðið að tyrkneskum meistara árið 2016, í fyrsta sinn frá árinu 2009. Hann endurtók leikinn árið 2017 þegar Besiktas vann deildina aftur.