Sindri Sverrisson, blaðamaður á Morgunblaðinu baunar á stjórnvöld í blaði dagsins. Hann lastar stjórnvöld fyrir lélega kosti fyrir íslenska landsliðið, þegar kemur að heimavöllum.
Þannig eru öll stærstu landslið Íslands með óboðlegar aðstæður þegar kemur að heimaleikjum. Knattspyrnuvöllurinn er ekki leikhæfur nema yfir sumartímann og Laugardalshöll er á undanþágu eftir undanþágu. ,,Það er til skammar og angrar mig alveg rosalega hvernig stjórnvöld hafa dregið lappirnar varðandi uppbyggingu íþróttamannvirkja hér á landi. Í raun finnst mér þó meira pirrandi að það skuli ekki vera hægt að setja fram skýr svör og stefnu í þessum málum,“ skrifar Sindri í Morgunblaðið og er augljóslega afar reiður.
Íslenska karlalandsliðið í fótbolta gæti þurft að fara með heimaleik sinn í lok mars á næsta ári, til Danmerkur eða Færeyja. Aðstæður hér á landi eru ekki viðunandi, það er Reykjavíkurborg og stjórnvöld sem hafa dregið lappirnar. ,,Nú eru bara fínar líkur á því að íslenska karlalandsliðið í fótbolta þurfi að spila heimaleik annars staðar en á Íslandi í mars. Við gætum hugsanlega haft samband við okkar gömlu herraþjóð Dani eða leitað á náðir Færeyinga, sem manni virðist að séu mun betur á tánum en við í þessum efnum. Þetta er auðvitað ömurleg staða. Á sama tíma er bara beðið eftir því að ekki megi lengur spila handboltalandsleiki hér á landi og aðstöðuleysið hér á landi varð til þess að Selfyssingar máttu ekki spila í Meistaradeild Evrópu í vetur. Frábært. Ég veit í raun ekki hvar keppnisaðstaðan er góð á Íslandi. Er eitthvert íþróttalandslið ánægt?.“
Íslensku landsliðin hafa náð mögnuðum árangri og ráðamenn duglegir að fagna árangri liðsins en láta ekki slag standa. ,,Ísland vann silfur á Ólympíuleikum og brons á Evrópumóti í handbolta, og fótboltalandsliðin okkar hafa komist á hvert stórmótið á fætur öðru, en íþróttaheimurinn hér á landi er verðlaunaður með blómum og kossum. Minnir í raun svolítið á jarðarför, sem er kannski ekki tilviljun. Mætti ég frekar biðja um aðgerðir.“
,,Ég gæti hugsanlega fyrirgefið allan þennan seinagang við uppbyggingu íþróttamannvirkja (það er að segja ef hann væri ekki orðinn svona mikill) ef stjórnvöld kæmu bara fram og segðu skýrt: „Sorrý, það eru ekki til neinir peningar núna en við erum búin að reikna út að hægt verði að gera nýjan völl og höll eftir 10 ár.“ En í staðinn hefur í mörg, mörg ár verið boðið upp á japl, jaml og fuður sem allir hafa svo gaman af. Engin skýr svör um hvert við stefnum og hvað verður gert hvenær. Ég hlakka til þess dags þegar úr þessu verður bætt.“