Emil Hallfreðsson, landsliðsmaður í knattspyrnu íhugar það að gerast umboðsmaður þegar ferill hans er á enda. Emil sem er 35 ára gamall er þessa stundina án félags, en gæti brátt gengið í raðir stórliðsins, Roma.
Emil hefur átt farsælan feril í atvinnumennsku og með íslenska landsliðinu, hann býst við því að starfa áfram í fótbolta þegar ferill hans sem leikmaður, er á enda.
,,Ég er með ákveðnar hugmyndir, ég ætla að leyfa tímanum að ákveða það. Ég hef áhuga á þjálfun, líka umboðsmennsku. Sé hvort hentar eða heillar betur,“ sagði Emil í hlaðvarpsþættinum, FantasyGandalf.
,,Ég verð pottþétt áfram í fótboltanum, ég hef lifað í þessu síðustu 15 ár. Ég hef búið til sambönd á Ítalíu og þar í kring.“
Emil fór árið 2006 til Malmö á láni frá Tottenham, fyrst um sinn bjó hann í íbúð en kunni ekki að kveikja ljósin þar. Hann var því í þrjár vikur með vasaljósið, þangað til faðir hans flaug út.
,,Ég fékk íbúð þarna, ég kunni ekki að setja ljósin í gang og beið eftir pabba í þrjár vikur. Var með vasaljós og sagan er á enda. Þarna var maður bara 22 ára og rólegur.“