Ísland fékk slæmt tap í París á mánudag, er liðið heimsótti Frakkland í undankeppni Evrópummótsins. Það vatki athygli á Stade de France að stuðningsmenn Frakklands sátu margir í stúku fyrir fjölmiðla.
Blaðamaður Morgunblaðsins, Sindri Sverrisson fer í Bakverði dagsins yfir muninn á aðstæðum í París og í Andorra þar sem Ísland vann sigur fyrir sléttri viku.
,,Heimavöllur heimsmeistaranna, Stade de France, er eðlilega talsvert glæsilegri en Estadi Nacional. Bíósalurinn fyrir blaðamannafundi er rúmgóður og vinnuherbergi fjölmiðlamanna skemmtilegt. Það fór líka vel um mann í stúkunni þó að einhverra hluta vegna, þar spilar kannski inn í að mikið var af lausum sætum í fjölmiðlastúkunni, höfum við íslensku blaðamennirnir þurft að sitja við hlið franskra stuðningsmanna sem helltu vel í sig á meðan á leik stóð og vildu ræða málin á frönsku, tungumáli sem ég kann ekkert í,“ skrifar Sindri í Morgunblaðið í dag.
,,Grasvöllurinn á Stade de France er glæsilegur, og myndbönd og atriði fyrir leik, þar sem 100 ára afmæli franska knattspyrnusambandsins var meðal annars fagnað, voru til fyrirmyndar og kveiktu í stuðningsmönnum.“
,,Ætli það megi ekki segja að Laugardalsvöllur sé í flokki á milli þessara tveggja leikvanga. Að ýmsu leyti dugar hann en að öðru, svo sem hvað varðar búningsklefa, er hann ekki lengur boðlegur og margt mætti bæta.“
