Real Madrid vann mikilvægan sigur um helgina er liðið mætti Real Betis á útivelli og hafði betur, 2-1.

Dani Ceballos skoraði sigurmark Real undir lokin en hann fær að spila frekar en spænski landsliðsmaðurinn Isco.

Isco fær ekkert að spila undir Solari þessa dagana og er talið að hann muni reyna að komast annað ef hlutirnir breytast ekki.

Aitor Costa, góðvinur Isco, hraunaði yfir þjálfara Real á Instagram eftir leikinn sem fór í gær.

,,Solari veit jafn mikið um fótbolta og ég veit um verkfræði,“ skrifaði hann á Instagram.

Hann hélt svo áfram og sagði að Solari væri ‘fótboltamorðingi’ en margir eru ósáttir við spilatímann sem Isco fær þessa stundina.

Blaðamenn Marca birtu dálk á vefsíðu sinni í gær þar sem þeir mældu með því að Isco myndi koma sér annað og það strax.