Arsenal á Englandi hafnaði tækifærinu að kaupa varnarmanninn Virgil van Dijk, leikmann Liverpool á 12 milljónir punda á sínum tíma.
Þetta segir John Collins, fyrrum aðstoðarstjóri Celtic en hann vann með Van Dijk hjá skoska félaginu.
Arsenal var eitt af mörgum liðum sem var orðað við Van Dijk á sínum tíma er hann vildi komast burt frá Celtic.
Southampton endaði á að kaupa leikmanninn og stóð hann sig virkilega vel þar áður en Liverpool eyddi 75 milljónum punda í Hollendinginn.
,,Yfirnjósnari Arsenal [Steve Rowley] var á því máli að hann væri of rólegur á vellinum,“ sagði Collins við beIN Sports.
,,Það var kannski partur af hans leik en hann tikkaði í svo mörg önnur box. Hann er með hraða, styrk, jafnvægi, er góður í loftinu og getur spilað boltanum.“
,,Hann er kannski full slakur stundum en hann er mjög góður leikmaður.“