Xherdan Shaqiri gekk í raðir Liverpool í sumar en félagið keypti hann á 13 milljónir punda frá Stoke.

Shaqiri hefur undanfarin ár verið stærsta stjarna Stoke en hann gat ekki komið í veg fyrir fall liðsins á síðustu leiktíð.

Svissnenski miðillinn Blick fullyrðir það í dag að Shaqiri hafi hafnað Manchester United áður en hann samdi við Liverpool.

Blick segir að Shaqiri hafi viljað vinna með Jurgen Klopp hjá Liverpool en hann er mikill aðdáandi Þjóðverjans.

Óvíst er hvaða hlutverk þessi 26 ára gamli leikmaður tekur að sér í vetur en ljóst er að það verður erfitt fyrir hann að vinna sér inn byrjunarliðssæti.