Ragnar Sigurðsson, leikmaður Rostov, gaf það út fyrr í sumar að hann væri hættur að leika með íslenska landsliðinu.

Raggi Sig lék með Íslandi á HM í Rússlandi í sumar en stuttu eftir mót greindi hann frá því að landsliðsskórnir væru komnir upp í hillu.

Erik Hamren, nýr landsliðsþjálfari Íslands, ætlar að ræða við Ragga líkt og hann gerði með Zlatan Ibrahimovic á sínum tíma hjá sænska landsliðinu.

,,Auðvitað ræði ég við hann, hann er mjög góður leikmaður og reynsla hans og gæði gera hann að lykilmanni í þessu liði svo auðvitað ræði ég við hann,“ sagði Hamren.

,,Það er mikilvægt þegar leikmenn byrja að hugsa um þetta að þeir taki ákvörðunina. Ég sagði það sama við Zlatan á sínum tíma þegar ég tók við Svíum.“

,,Á fyrsta blaðamannafundinum þurfti ég að segja frá því að Zlatan væri hættur með landsliðinu. Þetta verður að koma frá hjartanu, hann verður að taka þessa ákvörðun með það í huga.“

Landsliðið á 433 er í boði