Knattspyrnusamband Evrópu, UEFA, hefur dæmt finnska landsliðsmanninn Roman Eremenko í tveggja ára keppnisbann. Eremenko, sem er 29 ára leikmaður CSKA í Moskvu, á 73 landsleiki að baki fyrir finnska landsliðið, en hann var óvænt ekki í hópi Finna sem spilaði á Laugardalsvelli í haust.

Leikmaðurinn var tekinn í lyfjapróf eftir leik Bayer Leverkusen og CSKA í Meistaradeildinni þann 14. september síðastliðinn en í sýninu fundust leifar af kókaíni. Bannið þýðir að Eremenko mun ekki leika fyrir CSKA eða finnska landsliðið næstu tvö árin.

Eremenko getur áfrýjað banninu, en ekki liggur fyrir hvort hann muni nýta sér þann rétt.