Dæmdur í 100 ára fangelsi fyrir að drekkja stjúpdóttur sinni
Upptökur úr eftirlitsmyndavélum urðu til þess að karlmaður var dæmdur í hundrað ára fangelsi fyrir að drekkja þriggja ára stjúpdóttur sinni.
Atvikið átti sér stað við hótel í borginni Morelia í Mexíkó í ágúst á síðasta ári. Maðurinn hafði verið að gæta stjúpdóttur sinnar á meðan móðir hennar lagði sig.
Þegar hún vaknaði kom hún að dóttur sinni meðvitundarlausri fyrir framan sjónvarpið á hótelherbergi fjölskyldunnar. Hún var úrskurðuð látin á sjúkrahúsi við komuna þangað og kom þá í ljós að banamein litlu stúlkunnar var drukknun.
Við rannsókn málsins fór lögregla yfir upptökur úr öryggismyndavélum við umrædda sundlaug. Óhætt er að segja að átakanlegt hafi verið fyrir lögreglu að sjá það sem fyrir augu bar. Á upptökunum sást stjúpfaðir stúlkunnar, Jose David að nafni, henda henni út í laugina, skilja hana þar eftir og draga hana upp nokkrum sekúndum síðar. Stúlkan var að sjálfsögðu ósynd og þennan leik lék hann í nokkur skipti. Athygli vekur að aðrir sundlaugargestir gerðu ekkert til að stöðva manninn.
Myndbandið var birt opinberla á síðasta ári og vakti meðferð mannsins á stúlkunni – og viðbragðsleysi annarra sundlaugargesta – mikla hneykslan.
Saksóknarar höfðu farið fram á að Jose yrði dæmdur í 40 ára fangelsi, en dómari ákvað að fara eigin leið og dæmdi hann í hundrað ára fangelsi. Jose mun ekki geta sótt um reynslulausn og mun deyja á bak við lás og slá.