Leikarinn Woody Harrelson frumsýndi sína fyrstu kvikmynd sem leikstjóri um síðustu helgi. Það sem er sérstaklega áhugavert við myndina, Lost in London, er að hún var tekin upp í einni óslitinni hundrað mínútna töku á götum Lundúna og send út í beinni útsendingu í 500 kvikmyndahús í Bandaríkjunum og eitt í Bretlandi. Yfir hundrað manns komu að tökunni og ferðaðist myndavélin milli fjórtán tökustaða víðsvegar í London. Aðstandendur myndarinnar halda því fram að þetta sé í fyrsta skipti sem kvikmynd sé gerð og sýnd á þennan hátt.

Það er fyrst og fremst aðferðin frekar en innihaldið sem hefur vakið athygli og áhuga en í myndinni setur Harrelson á svið ævintýralegar raunir sem hann upplifði eina nótt í London árið 2002 – og segir „allt stóran hluta sögunnar“ vera sannan. Nóttin örlagaríka endaði með því að leikarinn var handtekinn fyrir að eyðileggja leigubíl. Auk Harrelson fara meðal annars Owen Wilson og kántrýstjarnan Willie Nelson með hlutverk í myndinni.