ASÍ, Stjórn Listasafns ASÍ, Kópavogsbær og menntamálaráðuneytið fá Brotalömina 2016
„Undanfarið starfsár hefur verið einstaklega viðburðaríkt í starfsemi safna. Mörg framfaraskref hafa verið stigin en einnig hefur afturför átt sér stað. Í ljósi þess að til staðar eru íslensk safnaverðlaun sem umbuna fyrir vöxt og viðgang í safnastarfi landsins finnur Angistarsafnið sig knúið til þess að vekja athygli á því sem grafið hefur undan safnastarfi í landinu. Því er efnt til skammarverðlaunanna Brotalömin 2016 í íslensku safnastarfi og hvatningarverðlaunanna Þrautseigjan 2016,“ segir í fréttatilkynningu sem DV hefur borist frá Angistarsafninu.
Skammarverðlaunin eru þar með veitt samhliða íslensku safnaverðlaununum 2016 sem verða veitt við hátíðlega athöfn á Bessastöðum í dag, en Byggðasafn Skagfirðinga, Listasafn Reykjavíkur – Ásmundarsafn og sýningin Sjónarhorn í Safnahúsinu er tilnefnd til verðlaunanna í ár.
Þeir sem eru hins vegar tilnefndir til skammarverðlaunanna Brotalamarinnar 2016 eru:
Stjórn Listasafns ASÍ og stjórn Alþýðusambands Íslands „fyrir slæmt fordæmi og framgöngu sína við sölu á sýningarrými safnsins: Ásmundarsal við Freyjugötu í Reykjavík.“
Kópavogsbær og mennta- og menningarmálaráðuneytið „fyrir að grafa undan starfsemi Tónlistarsafns Íslands með aðgerðum sínum og fölsku yfirvarpi um skipulagsbreytingar.“
Angistarsafnið veitir einnig hvatningarverðlaunin Þrautsegjan 2016, en þau hlýtur:
Náttúruminjasafn Íslands „fyrir þanþol, seiglu og langvinna baráttu við að sinna hlutverki sínu sem höfuðsafn á sviði náttúruminja.“
Að lokum fylgir tilkynningunni hvatning frá aðstandendum skammarverðlaunanna: „Öxlum ábyrgð – horfum til framtíðar og breytum íslensku safnastarfi með kröftugri umræðu og sýnum samstöðu í verki.“
DV hefur ekki tekist að grafa upp frekari upplýsingar um aðstandendur Angistarsafnsins eða valnefndina þetta árið og engin svör hafa borist um hvort verðlaunin verði veitt við hátíðlega athöfn.
Talsmenn Angistarsafnsins hafa svarað fyrirspurn DV en í svarinu segir meðal annars:
„Að baki Angistarsafninu stendur fólk sem er vel að sér í safna- og menningarmálum. En vegna smæðar lands og þjóðar verðum við að vera nafnlaus. Nafnleysisins vegna er ekki hægt að veita verðlaunin opinberlega. Helst vildum við geta afhent þau við ó-hátíðega athöfn í Núllinu, Bankastræti, miðað við stöðu þessa málaf(l)okks í landinu. Afhending fer fram rafrænt.“
Þá fylgdi með mynd af verðlaunagripnum.
