JS Watch Company Reykjavik og Gilbert úrsmiður hafa unnið unnið í samvinnu við strákana í íslenska landsliðinu í fótbolta að hönnun sérstaks HM-úrs, WORLD CUP MMXVIII eins og það heitir. Fyrir úrslitakeppni Evrópumótsins í knattspyrnu 2016 var hannað sérstakt EM-úr í samstarfi við strákana í landsliðinu. Það var gert með góðum árangri og þegar ljóst var að Ísland yrði með í úrslitakeppni heimsmeistaramótsins í Rússlandi í sumar óskaði fyrirliðinn Aron Einar Gunnarsson fyrir hönd strákanna í landsliðinu eftir því að búin yrði til ný útgáfa af úri og nú í tengslum við HM. EM-úrið var framleitt í 100 númeruðum eintökum og seldist mjög fljótt upp, en HM-úrið er framleitt í 300 númeruðum eintökum og er sala á úrunum nú í fullum gangi.
Hönnunin á úrinu er full af litlum smáatriðum sem tengjast landsliðinu og eru til dæmis tölurnar frá einum og upp í ellefu silfraðar. Þær tákna leikmennina. Tólfan, tölustafurinn 12 á skífunni, er rauð og táknar áhorfendur eða stuðningsmenn, 12. leikmanninn. Skífan er silfurhvít með blá mínútustrik upp í 45 en síðustu 15 mínúturnar eru afmarkaðar með rauðum strikum og á því svæði hringsins stendur „HALF TIME“ með vísun í leiktímann. Sekúnduvísirinn á úrinu er svo blár og í laginu eins og víkingaspjót. Á botninum á skífunni stendur ritað „FYRIR ÍSLAND“ og fyrir neðan miðju er nafn úrsins, WORLD CUP MMXVIII, þar sem R-ið snýr öfugt til marks um það að keppnin fer fram í Rússlandi. Á bakhliðinni stendur nafn framleiðandans, nafn úrsins og „VAR ÞAÐ EKKI“ til að minna á fagnaðarsöng landsliðsins eftir sigurleiki. Fyrstu 30 númerin eru frátekin fyrir landsliðshópinn.
JS Watch co. Reykjavik-úrin eru íslensk frá grunni. Þau eru hönnuð á teikniborði JS hér heima á Íslandi. Allir íhlutir úrsins eru síðan sérframleiddir eftir þeirra hönnun í mörgum, sérhæfðum verksmiðjum í Þýskalandi og Sviss og síðan settir saman hér á landi undir ströngu gæðaeftirliti Gilberts Ó. Guðjónssonar úrsmíðameistara sem nýtir áralanga þekkingu og reynslu sína af úrsmíði til að tryggja að hvert og eitt úr standist ströngustu kröfur.
Frá upphafi framleiðslunnar hefur verið leitast við að sameina glæsilega hönnun, gæði, fyrsta flokks úrverk og falleg armbönd. Vönduð úr eru munaðarvara og fylgihlutir sem bæði karlmenn og kvenmenn njóta þess að velja, bera og eiga. En úr er ekki bara skartgripur. Það er nytjahlutur sem hjálpar okkur að gegna skyldum okkar, halda loforð og skapa góðar minningar.
Fágæti úranna ásamt því að vera framleidd í hæsta gæðaflokki er það sem gerir þau eftirsóknarverð, en á skífu allra úranna stendur Reykjavík. Það ásamt, vönduðu verki, framleiðslu og sígildu útliti gerir úrin fágæt og einstök.
Úrvalið hefur aldrei verið meira en nánari upplýsingar um úrin og hönnunina má finna á vefsíðunni www.gilbert.is.
Gilbert úrsmiður, Laugavegi 62, sími: 551-4100.
