Sólin lét loksins sjá sig á suður og vesturlandi í gær við mikinn fögnuð landsmanna. Sundlaugar fylltust, raðir mynduðust fyrir utan ísbúðir og hvarvetna mátti sjá fólk njóta veðurblíðunnar. Fangarnir á Kvíabryggju tóku sólinni að sjálfsögðu fagnandi líkt og aðrir.
Líkt og fram kemur á facebooksíðu Fangelsismálastofnunar þá hefur veðrið ekki beinlínis leikið við fanga frekar en aðra þjóðfélagsþegna á suður-og vesturlandi.
„Fangar á Kvíabryggju nýttu því tækifærið í gær þegar sólin lét sjá sig og fóru í sjósund. Flestir hella sér í vinnu þegar góða veðrið lætur standa á sér en það er því miður ekki alltaf hægt í fangelsum.“
Fram kemur að föngum skorti stundum vinnu í fangelsinu og eru vinnuveitendur hvattir til að nýta sér starfskrafta þeirra.
„Ef ykkur vantar góða starfskrafta fyrir átaksverkefni þá endilega hafið samband við það fangelsi sem næst er starfseminni. Við getum unnið mörg verk, einföld og flókin.“