Samkvæmt niðurstöðum nýrrar skoðanakönnunar YouGov telja rúmlega 20 prósent Breta að fjölmenningarstefnan hafi beðið skipbrot. Rúmlega þriðjungur svarenda telur að íslamstrú ógni breskum lífsstíl. Könnunin var gerð fyrir samtökin Hope Not Hate sem vinna gegn fasisma. Nick Lowles, framkvæmdastjóri samtakanna, segir að niðurstaða könnunarinnar sýni að það sé greinilega verk að vinna.
Samkvæmt könnuninni telja 51 prósent Breta að aukið álag sé á mennta- og heilbrigðiskerfið vegna straums innflytjenda til landsins. The Guardian segir að könnunin hafi einnig leitt í ljós að margir telji að hliðarsamfélög þrífist við hlið hefðbundins bresks samfélags.
En það eru einnig jákvæðar niðurstöður úr könnuninni að mati Lowles þar sem hún sýnir að tæplega helmingur Breta telji Bretland vera vel heppnað fjölmenningarsamfélag. Lowles segir að á heildina litið hafi fjölmenningarstefnan heppnast misjafnlega í Bretlandi, hún hafi heppnast betur á sumum svæðum en öðrum.
