Á áttunda tímanum í gær gáfu lögreglumenn ökumanni bifreiðar merki um að stöðva aksturinn þar sem bifreiðinni var ekið um Garðabæ. Eftir að stöðvunarmerki höfðu verið gefin skiptu ökumaður og farþegi um sæti áður en aksturinn var stöðvaður. Í bifreiðinni var par með tvö ung börn. Parið er grunað um að hafa verið undir áhrifum áfengis og fíkniefna og að hafa ekki notað öryggisbelti við aksturinn. Börnunum var ekið heim og komið í öruggar hendur á meðan lögreglan lauk rannsókn málsins og sýnatökum.
Á sjöunda tímanum í gær var ökumaður handtekinn á Reykjanesbraut í Hafnarfirði en hann er grunaður um að hafa verið undir áhrifum fíkniefna. Í bíl hans var 16 ára barnshafandi stúlka og var barnaverndaryfirvöldum því tilkynnt um málið.
Fjórir ökumenn voru handteknir í gærkvöldi og nótt grunaðir um að vera undir áhrifum fíkniefna.