Skot hljóp úr riffli á lögreglustöð í Reykjavík í apríl á þessu ári, um var að ræða mannleg mistök og engan sakaði. Vísir greinir frá því að farið hafi verið ítarlega yfir þjálfun lögreglumanna í kjölfarið.
Lögreglan lagði hald á riffilinn í húsleit á höfuðborgarsvæðinu í apríl, kannabisræktun var í húsinu og lagði lögreglan hald á stera, peninga, önnur fíkniefni, haglabyssu og þrjá riffla, þar af voru tveir hálfsjálfvirkir.
Í svari við fyrirspurn Vísis segir Þórir Ingvarsson lögreglufulltrúi að farið hafi verið yfir vopnin á lögreglustöðinni og lögreglumaður kannað hvort hún væri hlaðin en ekki tekið eftir skotinu. „Þegar hann hins vegar lokaði byssuhúsinu og lagði boltann aftur hljóp skotið úr byssunni. Engan sakaði en byssuhlaupið sneri frá lögreglumönnunum og lenti skotið því í steyptum vegg,“ segir Þórir.