Skiptum í þrotabú Hundaræktarinnar að Dalsmynni er nú lokið en ræktunin var tekin til gjaldþrotaskipta þann 2. maí. Kröfum upp á 2,3 milljónir króna var lýst í búið en engar eignir fundust upp í þær kröfur. Það er Rúv sem greinir frá þessu í dag.
Matvælastofnun stöðvaði starfsemi Hundaræktarinnar í Dalsmynni á grundvelli laga um velferð dýra um miðjan apríl. Ástæða stöðvunarinnar var sú að kröfur stofnunarinnar um varanlegar úrbætur höfðu ekki verið virtar, einkum varðandi þjálfun, umönnun og umhirðu hundanna með tilliti til hreinlæti og skráningar. Viðhaldi húsnæðis var sömuleiðis ábótavant. Þá voru aðgerðir og áætlanir vegna ormameðhöndlunar hunda ásamt sýnatökum ekki fullnægjandi.
Hundaræktuninni var veittur frestur til eins mánaðar til að ráðstafa hundum að Dalsmynni og komast þannig hjá vörslusviptingu hunda af hálfu Matvælastofnunar.
Hundaræktunin Dalsmynni hefur oft verið í umræðunni undanfarin ár vegna aðbúnaðar dýranna sem þar voru ræktuð. Miklar umræður sköpuðust um staðinn í kjölfar þess að fjallað var um hundaræktunina í sjónvarpsþættinum Málið sem sýndur var á Skjá einum.