Þetta kemur fram í Fréttablaðinu í dag en blaðinu barst yfirlýsing frá Sindra vegna málsins. í yfirlýsingunni segir Sindri að honum hafi verið haldið á Sogni án dóms og laga þar sem gæsluvarðhaldsúrskurður yfir honum hafi ekki verið í gildi þegar hann strauk. Dómari hafði tekið sér frest til að ákveða hvort hann féllist á kröfu lögreglunnar um áframhaldandi gæsluvarðhald og því telur Sindri að hann hafi í raun verið frjáls maður en hafi verið neyddur til að unddirita skjöl um að hann myndi gista í fangaklefa þar til búið væri að samþykkja framlengingu á gæsluvarðhaldi. Sindri er grunaður um aðild að þjófnaði á um 600 tölvum úr þremur gagnaverum.
Á vef Fréttablaðsins kemur fram að Sindri segist hafa setið í gæsluvarðhaldi í tvo og hálfan mánuð að ósekju og hyggist kæra málsmeðferðina til Mannréttindadómstóls Evrópu. Honum hafi ekki verið sýnd nein sönnunargögn og hafi verið hótað að hann myndi sitja lengur í einangrun ef hann myndi ekki benda á þýfið.
Hann segist hafa tekið ranga ákvörðun þegar hann ákvað að flýja en nú sé unnið að því að semja við lögregluna um að hann komi heim aftur án þess að vera handtekinn erlendis. Hann þurfi ekki að snúa heim því hann geti verið á flótta erlendis eins lengi og hann vilji, að hann sé kominn í samband við fólk sem aðstoðar hann en hann ætli að takast á við málið hér á landi og komi því heim fljótlega.
Fréttablaðið segist hafa heimildir fyrir að Sindri hafi keypt íbúð á Spáni skömmu og hafi selt búslóð sína og ætlað að flytjast til Spánar en vinir hans og meintir samverkamenn hafa flutt þangað á undanförnum misserum.
Yfirlýsingu Sindra er hægt að lesa í heild sinni á vefsíðu Fréttablaðsins.