Bandaríkin, með stuðningi Breta og Frakka, hófu loftárásir í Sýrlandi skömmu eftir miðnætti að íslenskum tíma og beindist árásin að bækistöðvum sýrlenska stjórnarhersins þar sem grunur leikur á að efnavopn séu geymd. Árásin í gærkvöldi var svar við efnavopnaárásinni í Douma, útverfi Damascus, um liðna helgi.
Í yfirlýsingu frá Pentagon, skömmu eftir að sprengingar heyrðust í Damascus, kom fram að ráðist hefði verið á þrjú skotmörk; tvö í Damascus og eitt í Homs. Grunur leikur á að á þessum stöðum geymi Sýrlandsher eða geri tilraunir með efnavopn. Sýrlandsher reyndi að skjóta eldflaugar Bandaríkjahers niður en án árangurs.
Árásin í gærkvöldi hefur hleypt illu blóði í Rússa og sagði Anatoly Antonov, sendiherra Rússa í Bandaríkjunum, að aðgerðum sem þessum fylgdu afleiðingar. Hann fór ekki nánar út í hverjar þær afleiðingar yrðu en sagði að Rússar álitu árásina sem beina ógn. Það væri óásættanlegt að „móðga“ forseta Rússlands eins og hann orðaði það.
Bandaríkjamenn hafa varið árásirnar og sagt að efnavopnaárásin um liðna helgi bæri þess merki að stjórn Assads Sýrlandsforseta hikaði ekki við að beita efnavopnum. Merki væru um að stjórn hans væri að færa sig upp á skaftið hvað þetta varðar. Bandaríkjamenn muni halda áfram að gera árásir svo lengi sem sýrlenski stjórnarherinn heldur áfram að nota efnavopn.
Árásirnar voru gerðar með stuðningi Breta og Frakka og sagði Theresa May, forsætisráðherra Bretlands, að hún hefði heimilað þátttöku Breta með það að leiðarljósi að ráðast á bækistöðvar þar sem efnavopn eru geymd. Hún skaut að Rússum og sagði að það mætti ekki vera eðlilegur hluti af hernaði að nota efnavopn. May sagðist hafa viljað fara aðra leið en miðað við allt og allt væri engin önnur leið fær, því miður.
Breska varnarmálaráðuneytið segir að fjórar Tornado-þotur hafi flogið frá Kýpur og tekið þátt í árásunum í Homs. Varnarmálaráðherra Bandaríkjanna, James Mattis, sagði að Bandaríkin, Bretland og Frakkland útilokuðu ekki frekari árásir. „Stjórn Assads náði að minnsta kosti ekki skilaboðunum síðast,“ sagði hann og vísaði til efnavopnaárásarinnar í Ghouta árið 2017. Hvað hugsanlegt mannfall saklausra borgara varðar sagði hann að bandaþjóðirnar hefðu lagt mikla áherslu á að forða manntjóni.
Emmanuel Macron, forseti Frakklands, sagði að efnavopnanotkun Sýrlandshers ógnaði ekki bara sýrlenskum ríkisborgurum heldur öllum heiminum.
Vladimír Pútín Rússlandsforseti sagði þá ákvörðun Bandaríkjanna, Breta og Frakka að ráðast gegn Sýrlendingum væri hreint og klárt ofbeldi. Hann hefur farið fram á að kallað verði til neyðarfundar í öryggisráði Sameinuðu þjóðanna.
